ازاى تعملى حلويات ومشروبات شتوية مصرية؟
الجو ده محتاج حاجات حلوة تدفي .
البليلة:
المكونات:
- كوباية غلة بليلة.
- كوبيتين لبن حليب.
- معلقة صغيرة فانيليا.
- نص كوباية قشطة.
- ربع كوباية سكر.
- عسل ومكسرات للتزيين.
الطريقة:
- نقى الغلة واغسليها كويس وانقعيها فى ماية لمدة ليلة .
- صفى القمح وحطيه فى حلة وعليه تلت كوبيات ماية على نار متوسطة لحد مايغلى .
- وطى النار وسيبيه لحد ماحبة الغلة تتفتح بياخد تقريبا من ساعتين لاربع ساعات .
- فى حلة صغيرة اخلطى اللبن مع القشطة والفانيليا والسكر على النار لحد ما السكر يدوب .
- وزعى كميات من البليلة فى بولات التقديم (نص بولة)وضيفى عليها كمية من خليط اللبن (الكمية حسب الرغبة).
- زينى البولات بالمكسرات والعسل .
طريقة عمل ام علي:
المكونات:
- نص لفة جلاش او رقاق .
- تلت كوبيات لبن حليب.
- كوباية قشطة.
- كوباية كريمة.
- كوباية سكر.
- نصف كوباية زبيب.
- نصف كوباية جوز هند.
- ربع كوباية لوز شرايح.
- ربع كوباية بندق مجروش.
- نص كوباية فستق مفرومة.
طريقة التحضير:
- قطعى الجلاش او الرقاق لشرائح صغيرة ووزعيها فى الصينية ودخليها الفرن لحد ما تتحمص .
- اخلطى اللبن والكريمة والسكر على النار لحد ما الخليط يغلي .
- فى طاجن حطى الجلاش او الرقاق المتحمص وعليه جوز هند والزبيب والمكسرات .
- ضيفى خليط من اللبن الحليب عليه ووزعى القشطة على سطح الطاجن.
- دخلى ام على الفرن لمدة 15 دقيقة او 20 دقيقة .
طريقة عمل سد الحنك:
المكونات:
- 4معالق كبار دقيق.
- 6معالق كبار سكر.
- معلقة كبيرة زبدة .
- مايه.
الطريقة:
- سيحى الزبدة وضيفي عليها الدقيق وقلبيه كويس لحد ما الدقيق يبقى لونه بنى .
- دوبى السكر فى ربع كوباية ماية وضيفيها على الدقيق واقلبي لحد ما المكونات تتماسك .
- شكليها بالمعلقة لكرات وممكن تزينيها بجوز الهند او المكسرات.
طريقة عمل حمص الشام (الحلبسة)
المكونات:
- نص كيلو حمص شام (حبات كبيرة).
- بصلتين.
- 5 فصوص توم.
- حبتين طماطم كبار.
- ليمونة كبيرة او اتنين صغيرين.
- معلقتين كبار ونص صلصة طماطم.
- معلقة صغيرة ونص كمون.
- معلقة صغيرة ملح.
- شطة حسب الرغبة.
الطريقة:
- انقعى الحمص فى مايه لمدة 8 او 12 ساعة .
- صفى الحمص وحطيه على النار فى مايه مغلية مقدار الماية بيكون اكتر من مقدار الحمص بكوبيتين وربع.
- ضيفى بصلة مقطعة اربعة مع نص معلقة صغيرة من الكمون والملح.
- بعد مايستوى تلت ارباع سوا صفى الحمص من الماية .
- صفى ماىة السلق من بصل وضيفي عليها الطماطم والبصلة مقطعة ارباع والتوم والصلصة وباقى الكمون على نار متوسطة.
- سيبي الخليط يغلى لحد ما الطماطم تنفصل عن قشرها .
- صفى الماية من قشر الطماطم وضيقى عليها الحمص وسيبيه على النار لحد ما يستوى وقدميه فى كوبيات وضيفى الشطة حسب الرغبة.
طريقة عمل الحلبة المطحونة باللبن:
المكونات:
- معلقتين صغيرين سمنه.
- معلقتين كبار حلبه مطحونة .
- كوبين لبن حليب.
- معلقتين كبار سكر.
- جوزهند.
- فول سودانى.
- زبيب للتزين.
الطريقة:
- سيحى السمنة فى حلة صغيرة وضيفي عليها الحلبة وقلبيها لحد ما تحمر وريحتها تظهر .
- ضيفى اللبن بالتدريج مع التقليب عشان تتجنبي انها تتكتل .
- ضيفى السكر وقلبي لحد ما السكر يدوب وقوامها يبقى متوسط .
- وزعى الخليط فى كوبيات وزينيها بالسودانى والزبيب وجوز الهند.
طريقة عمل السحلب:
المكونات:
- كوباية سكر بودرة.
- كوباية دقيق ارز.
- 5 معالق كبار نشا درة.
- كوباية لبن بودرة.
- معلبقة صغيرة فانيليا.
- ربع كوباية سمسم.
- نص كوباية فول سودانى .
- نص كوباية جوز هند.
- ربع كوباية زبيب.
الطريقة:
- اخلطى السكر البودرة مع نشا الدرة ودقيق الارز واللبن البودرة والفانيليا.
- احفظى المكونات فى برطمان محكم الغلق .
- اخلطى السمسم مع جوز الهند والسودانى والزبيب.
- استخدمى تلت معالق كبار من خليط السخلب لكل كوباية لبن واقلبيه على النار لحد ما يبقى قوامه متماسك وضيفى كمية المكسرات المفضلة .
تعليقات
إرسال تعليق